Жаңа оқу жылына дайындық – 10 орта мектеп, 1 негізгі мектеп, 4 бастауыш мектеп жұмыс жасайтын ауданымыздың білім беру саласында жаз бойы атқарылған шаруаның бірі. Сондай-ақ ауданда білім беру жүйесінің түрлі қажеттіліктерін ескере отырып, бір мектеп-гимназия, 12 бөбекжай-бақша, үш саз мектебі, бір оқушылар үйі, «Барыс» балалар-жасөспірімдер дене шынықтыру даярлық клубы мен №4 психологиялық-педагогикалық түзеу кабинеті де қызмет көрсететінін ескерсек, саланың салмағы арта түседі.
Жаз бойына жүрген жаңа оқу жылына дайындық барысында күзгі-қысқы маусымға қажетті барлық қауіпсіздік және техникалық паспорттар жасақталуы тиянақталып, әр мектепте оқу процесінің үздіксіз әрі сапалы жүруіне жағдай жасау үшін дайындық актілері толығымен рәсімделген. Нәтижесінде, сала басшыларының айтуынша, оқушылар мен ұстаздарға жайлы әрі қауіпсіз оқу ордасы қалыптасып отыр.
Тағы да деректерге ден қойсақ, биыл білім саласына маңызды қаржылық қолдау көрсетілулі, ол қаржылар негізінен оқу процесін жақсарту мен білім ордаларын заманауи талаптарға сай жабдықтау бағытындағы шаруаларға жұмсалды. Соның арқасында ауданымыздағы білім беру мекемелерінің материалдық-техникалық базасы нығайып, оқушылар мен тәрбиешілер үшін сапалы және жайлы жағдайлар жасалған. Бұл – білім саласына көрсетілген ерекше назар мен қолдаудың айқын көрінісі десе болады.
Өткен жылы ауданымызда 5221 оқушы 293 сыныпта білім алса, биыл бұл көрсеткіш 5363 оқушыға дейін артқан, олар 294 сыныпқа бөлінеді. 1-сыныпқа 26 тамызға дейін 427 бала қабылданған, бұл көрсеткіш әлі өзгеретін болады.
Міне, қазіргі таңда 802 мектеп мұғалімі, 219 балабақша тәрбиешісі, 68 қосымша білім беру педагогі және 8 түзету кабинеті маманы қызмет атқаратын салада жаңа оқу жылында мұғалімдер қатары жас мамандармен де толыға түспек. Салмақты сала үшін жаңа оқу жылы басталар сәт те жетті. Биыл Қазақстан Республикасының Конституциясы күні мерекесі сенбіге сәйкес келгендіктен қыркүйектің 1-і ресми демалыс күні болуына байланысты оқу жылы 2 қыркүйектен басталып, барша білім ұялары шәкірттері үшін есіктерін айқара ашады. Іске сәт, ұстаздар, біліміңмен оз, шәкірттер!
Жоламан ДӘУЛЕТИЯР
