Мүмкіндігі шектеулі жандарды жан-жақты қолдау – демократиялық қоғамның барлығына тән құбылыс. Сондықтан 5 қарашадағы аудан әкімі мен облыстық маңызы бар қалалардың әкімдерін сайлау кезінде   мүгедектігі бар азаматтар үшін дауыс беру барынша қолжетімді болуы қажет.

Исатай ауданында барлығы 15883 сайлаушы, оның ішінде ерекше жағдайды талап ететін мүгедектігі бар 114 сайлаушы болса, аталған категориядағы адамдар үшін учаскелерде бұрыштар жасақталып, дауыс беруге барлық жағдайы ұйымдастырылған. Аудан бойынша 1 аумақтық, 15 учаскелік сайлау комиссиясы, оларда 102 комиссия мүшесі жұмыс жасайды. Бұл туралы Исатай аудандық аумақтық сайлау комиссиясының мәліметінде келтірілген.

Исатай аудандық аумақтық сайлау комиссиясы төрағасының орынбасары Самат Мирас Саматұлының айтуынша, мүгедектігі бар жандар  үшін арнайы жағдай жасалған.

–Мүгедектігі бар азаматтардың саяси және қоғамдық өмірге қатысуын қамтамасыз ету басты назарда. Аудандағы 15 сайлау учаскенің бәрі пандуспен жабдықталған. Сонымен қатар сайлау учаскелерінде мүгедектігі бар жандар үшін тактильді жолақтар  зағип және есту қабілеті нашар жандар үшін моноблок пен құлаққаптар, брайль шрифт, лупа, арбаға таңылған жандарға арнайы кабиналар және тағы басқа құралдар бар. Сонымен қатар үйінен дауыс беретін сайлаушылар қағаз жүзінде өтініш беру арқылы алдын ала үйіне шақыртады. Учаскелік сайлау комиссия мүшелері барып, дауыстарын алып келеді,-деді ол.

Иә, аудан бойынша инватаксилер де өз жұмысына сақадай-сай. Мүгедектігі бар жандар алдын ала тапсырыс беру арқылы қызметке қол жеткізе алады.

Мамандардың мәліметінше ауданда арбаға таңылған - 25 адам болса, есту қабілеті нашар - 35 адам және зағип немесе нашар көретін жандар 54 адамды құрайды.

Жайна МӘЛІМҚОЖА