Салықтан түскен әрбір теңге – мемлекеттің экономикалық жүйесін нығайтып, халықтың өмір сапасын жақсартуға бағытталуы тиіс маңызды ресурс. Бұл қаражат ең алдымен азаматтарға сапалы мемлекеттік қызмет көрсетуді қамтамасыз етуге, тұрмысқа қажет инфрақұрылымды дамытуға және әлеуметтік қолдау шараларын жүзеге асыруға жұмсалады. Яғни салық түсімдері – мектеп, аурухана, жол, тұрғын үй-коммуналдық желілер, қоғамдық қауіпсіздік, экологиялық жобалар сияқты күнделікті өмірімізбен тығыз байланысты салалардың тұрақты жұмыс істеуінің негізгі кепілі.
Мемлекеттік бюджеттің тиімді әрі ұтымды пайдаланылуы қоғамның әлеуметтік-экономикалық дамуына тікелей әсер етеді. Қаржы дұрыс бағытталса, жаңа жұмыс орындары ашылып, кәсіпкерлік өркендеп, өңірлердің арасындағы даму теңгерімі нығая түседі. Сонымен қатар, мемлекеттік бағдарламалардың сапалы орындалуы халықтың мемлекетке деген сенімін арттырады.
Осы себепті салықтан жиналған қаражаттың ашық, әділ және мақсатты жұмсалуы — бүгінгі күннің аса маңызды мәселесі. Қаржы қозғалысының айқын болуы бюджеттік тәртіпті күшейтіп қана қоймай, жемқорлық тәуекелдерін азайтады. Ашықтық – жауапкершілікті, тиімділік – нәтижені қамтамасыз етеді.
Салық – мемлекет пен халық арасындағы сенім көпірі. Сол көпірдің мықты болуы – қоғамның болашағы мен тұрақты дамуының негізгі шарттарының бірі.
Рафиғат ТАЖИДЕНОВА,
Қамысқала ауылдық округінің әкімі
