Кейбір мамандық жүрек қалауы болса, енді бірі тағдырдың тартуы. Ал әскери қызмет – осы екеуінің тоғысқан тұсы. Бұл мамандықты таңдаған жан – өмірін тәртіпке, болмысын адалдыққа, жанын Отанға бағыштаған адам. Бұл жай ғана жұмыс емес, бұл – ел тыныштығын күзету жолында таңмен таласа тұрып, қара жердің тынысымен бірге соғатын жүрек иелерінің өмір салты.
Осындай ұлы жолдың бел ортасында – Қазақстан Республикасы Ұлттық ұланының 5546 әскери бөлімі тұр. Бұл бөлім – Атырау қаласының қақ төрінде орналасқан, ел ішіндегі тыныштық пен қоғамдық тәртіптің тірегі, темірдей тәртіп пен бауырмалдыққа құрылған қасиетті ұжым. Мұнда қызмет ету – жай ғана борыш емес, өмірлік миссия.
5546 әскери бөлімі – бейбіт күннің батырларын тәрбиелейтін үлкен мектеп. Бұл жерде әр сарбаз сапқа тұрумен бірге азаматтық жауапкершіліктің шыңына көтеріледі. Әр тапсырма – сенім, әр сәт – тәртіп, әр қадам – ел алдындағы борыш. Мұнда жай киімді камуфляжға ауыстырумен іс бітпейді – бұл өзін ел тыныштығына арнаған жанның ішкі жаңғыруы.
Жуырда осы қасиетті шаңырақта тағы бір маңызды әрі тағылымды сәт орын алды. Атырау қаласындағы 5546 әскери бөлімінде Отанға адал болуға ант берген 200-ден астам жас сарбазға салтанатты түрде қару табысталды.
Шара әскери бөлімнің саптық алаңында өтіп, жас жауынгерлер үшін бұл ұмытылмас тарихи сәтке айналды. Қатар түзеген жас жауынгерлерді бөлім командирі, подполковник Самет Құлахмедов құттықтап, ізгі тілектерін білдірді.
– Кеше ғана Отанға адал қызмет етемін деп әскери ант қабылдаған сіздерге бүгін жауынгерлік қару табысталып отыр. Бұл – үлкен жауапкершілік. Қарумен бір жыл бойы жауынгерлік міндеттеріңізді атқаратын боласыздар. Қызметтеріңізге сәттілік тілеймін. Еліміздің бейбіт аспаны астында қаруды тек оқу-жаттығу мақсатында ғана қолданатын болыңыздар, -деді бөлім командирі.
Бұл салтанатты рәсім жас сарбаздардың рухын көтеріп, әскери борышқа деген жауапкершіліктерін еселей түсті. Қолына қару алып, Отан алдындағы парызын өтеуге қадам басқан әрбір жауынгер енді Атырау қаласының тыныштығы мен қауіпсіздігін қамтамасыз ету жолында аянбай қызмет ететін болады.
Бөлімнің басты мақсаты – сарбаздарды жан-жақты даярлау. Олар тек қару ұстауды емес, елге қызмет етудің маңызын, тәртіпке бас июдің салмағын, бауырластық пен өзара қолдаудың құндылығын бойларына сіңіреді. Мұндағы жаттығулар бұлшық етті ғана емес, рухты да шыңдайды. Себебі бүгінгі күнде нағыз жауынгер – тек дене күшімен емес, ішкі рухымен жеңеді.
5546 әскери бөлімінің тарихы – ерлік пен абыройдың айнасы. Мұндағы жеке құрам түрлі жарыстар мен оқу-жаттығу жиындарында үнемі үздіктер қатарынан көрініп жүр. Бұл – сарбаздардың шеберлігінің, ұжымның ауызбіршілігінің, тәртіп пен талаптың жемісі. Бірлігі бекем бөлім – қандай сынға да төтеп береді.
Бұл бөлімде қызмет ету – үлкен өмір мектебі. Әр командир – ұстаз, әр сарбаз – бауыр, ал бөлімнің өзі – қасиетті шаңырақ. Мұнда достық майданда сыналатын сенімге, ал алынған тәлім өмір бойы серік болатын ұстанымға айналады.
5546 бөлім – тек әскери нысан емес, бұл – тәртіп пен тұрақтылықтың символы. Қоғамдық тыныштықты сақтау, аса маңызды мемлекеттік нысандарды күзету, төтенше жағдайлар кезінде жедел көмек көрсету – мұның бәрі осы бөлімнің күнделікті міндеті. Олар – үнсіз күзетте тұрған, даңқсыз, бірақ асқақ бейбіт күннің батырлары.
Қорытқанда, 5546 әскери бөлімі – бұл Отан алдындағы адалдықтың, ерлік пен табандылықтың мекені. Мұнда қызмет ету – азаматтық болмысыңды шыңдап, нағыз ел қорғаны атану. Бұл жол жүрекпен таңдалатын, намыспен атқарылатын, тек биік мақсат пен ұлы сенімге негізделген жол.
«Ер – елінің қорғаны, ел – ерінің арманы» демекші, бұл бөлім – туған елге деген адалдықтың мекені, ал әскери жол – ар-намысты ту еткен, мәрттікпен көмкерілген өмір жолы.
Бақытжан СЕРІКОВ,
ҚР Ұлттық ұланы 5546 әскери бөлімінің тәрбие бөлімшесінің аға офицері, лейтенант
Атырау қаласы
