Исатай аудандық кәсіпкерлік және ауылшаруашылық бөлімінің ұйымдастыруымен Аққыстау теміржол ғимараты алдында ауылшаруашылығы жәрмеңкесі өтті.
Оған біздің аудан шаруа қожалықтары мен көрші Махамбет ауданы және Батыс Қазақстан облысынан келген кәсіпкерлер қатысты. Жәрмеңкеде картоп 160-180 теңге, жуа 90-100 теңге, қызылша 110-130 теңге, сәбіз 110-130 теңге, қырыққабат 90-110 теңге, құс еті 750-850 теңге, балық өнімдері 670-700 теңге аралығында сатылды. Жәрмеңкеге өз өнімдерін әкелген шаруагерлер бағаның базар мен сауда дүкендеріне қарағанда, төмен екенін алға тартады.
- Жәрмеңкеге біз сүт, балық өнімдерін әкелдік. Әкімдік бекітіп берген баға бойынша саудалап жатырмыз. Үстінен пайда көріп жатқанымыз жоқ. Әйтеуір құнын ақтайды. Өйткені, қазір Үкімет тарапынан кәсіпкерлерге көп жеңілдіктер жасалуда, - дейді шаруагерлер.
Ризабек Жақсыбаев, аудандық кәсіпкерлік және ауылшаруашылық бөлімінің бас маманы:
- Аудан орталығында ауылшаруашылығы өнімдерінің жәрмеңкесі апта сайын жұма күні, басқа ауылдық округтерде әр аптаның бейсенбі күндері тұрақты өткізіліп келеді. Жәрмеңкелерде сондай-ақ кәсіпкерлер әлеуметтік маңызы бар тағамдарды тұтынушыларға (жұмыртқа, күнбағыс майы, сары май, макарон өнімі, еттің кейбір түрі, т.б.) шекті бағамен ұсынуда. Егер олар аталған шекті мөлшерден, яғни, тауарды 15% өсіммен сатса, онда кәсіпкер 200 айлық есептік көрсеткіш көлемінде айыппұл төлейді. Мәселен, 16 сәуір күні өткен аудан орталығы мен ауылдық округтерінде өткізілген жәрмеңкелерде көкөністер мен жеміс-жидектер, құс еті, балық өнімдері базардағыдан төмен бағамен сатылды.
Аяпберген САЛИХОВ