Арнайы басқосуда айтылған ақиқаттың бірі осы болды. Жиынның тұс алдындағы тілдесуімізде ауыл әкімінен білгеніміздей, округте 1084 үй бар екен. Ал поштадан берілген мәліметте аталған округке қазір барып тұрған газет саны 134 дана ғана. Соншама үйге барып тұрған аудан айнасының бары осы, яғни тұрғындардың тоқсан пайызы газет оқымайды десек болғандай.
Бір қызығы, осыны естігендердің бәрі бас шайқап қалысты. Сірә, бұл көрсеткіштен біразы бейхабар болса керек. Біз өз тарапымыздан осы жолғы жазылу барысындағы көрсеткіш бейсенбіге дейін 31 дананы ғана қамтығанын да көлденең тартып, «намысқа тырысып көрсекші» деген ойымызды да ортаға салдық.
Осы жерде ауыл әкімі жиын өтіп жатқан жұма күні ауыл бойынша аудандық газетке жазылудың 68 данаға жеткенін айтып қалды. Бұл, сірә, кешелі бері ауылдық округ әкімі аппараты қызметкерлері мекемелерге қоңыраулатып, жиында жазылу жайы сөз болатынын айтқаннан кейінгі әрекеттің арқасында емес пе екен деген ойға да берілгеніміз рас. Мекеме басшыларымен де ой бөлісуіміз осы төңіректен бастау алған.
Жоламан ДӘУЛЕТИЯР
