Тарих үшін отыз жыл – қас-қағым сәт қана. Бірақ осы уақыт ішінде Қазақстанның Ата Заңы – Конституциясы халқымыздың тәуелсіздігін тұғырландырып, мемлекетіміздің даму бағдарын айқындаған темірқазыққа айналды. Бүгін аудан жұртшылығы осы ұлы құндылықты дәріптеп, елдіктің мерейлі мерекесін «Жалын» мәдениет үйінде кеңінен атап өтті.
Салтанатты жиында Қазақстан Республикасының Мемлекеттік Туы кіргізіліп, Әнұраны асқақтата шырқалған сәттен-ақ мерекелік рухты сездірді. Көңілде мақтаныш, жүректе елге деген сүйіспеншілік тербеліп, залды ерекше қуаныш пен бірлік сезімі кернеді.
Содан соң сахна төрінде «Жалын» би тобы қазақ биін нақышына келтіріп билеп, мерекелік кештің сәнін кіргізді.
Аудан әкімінің уақытша міндетін атқарушы Жақсылық Жанұзақов сахнаға көтеріліп, құттықтау сөзін айтты:
– Ата Заңымыз – елдігіміздің темірқазығы, тәуелсіздігіміздің тұғыры. Бүгінгі мерейлі мерекеде біз еліміздің негізгі құжаты – Конституцияның қадір-қасиетін тағы бір мәрте сезінеміз. Әділетті қоғам құруға бағытталған әрбір қадамымыздың бастауы – осы заңнан туындайды. Сондықтан да біз заңға құрмет көрсетіп, болашаққа сеніммен қадам басамыз,-деді ол.
Ж.Жанұзақов өз сөзінде ауданның әлеуметтік дамуына сүбелі үлес қосып жүрген бірқатар азаматтарға аудан әкімінің Алғыс хаттарын табыстады. Олардың қатарында өрт сөндірушілер, полиция мен прокуратура қызметкерлері, құқық пәнінің мұғалімдері бар. Әсіресе, 1995 жылы 30 тамыз – Конституция күні дүниеге келген азаматтарға арнайы құрмет көрсетіліп, ерекше марапат берілді.
Келесі сөз кезегі аудандық мәслихат төрағасының уақытша міндетін атқарушы Жәнібек Ещановқа берілді.
– Конституция – мемлекетіміздің дамуы мен тұрақтылығының кепілі. Бұл күн – барша қазақстандық үшін қасиетті әрі қастерлі мереке. Ата Заңымыздың арқасында бейбіт өмір сүріп, жасампаз істер атқарып отырмыз. Бүгінгі марапат иелері – соның айғағы,- деді ол.
Жәнібек Сапаұлы Конституция мерекесіне орай аудандық мәслихаттың Алғыс хаттарын табыстап, азаматтардың қоғамдағы еңбегіне жоғары баға берді.
Салтанатты шара аудан өнерпаздарының концерттік бағдарламасымен жалғасты. Ш.Шәріпов атындағы балалар саз мектебінің фольклорлық ансамблі ұлттық әуендерді нақышына келтіріп орындап, көпшіліктің ыстық ықыласына бөленді.
Сонымен қатар, аудан өнерпаздары орындаған әндер мен билер мерекенің ажарын аша түсті.
Залда отырған жұртшылық мерекелік көңіл-күйді сезініп, «Ата Заң – айбыным, Тәуелсіздік – тұғырым» деген ұранның шынайы мәнін жүрекпен түйсінді.
Еркебұлан ЗИНЕДЕНОВ
