Жайдары жазда да жазатайым оқиғалар болмай тұрмайтыны белгілі.
Соның бірі – күннің ысуымен қаупі күшейе түсетін өрт оқиғалары. «Сақтықта қорлық жоқ», оның алдын алу бағытында жыл сайын қолға алынып жүрген шара сол бағыттағы оқу-жаттығу жиындары. Аудан әкімінің орынбасары Е.Абилхасимов бекіткен аудан көлемінде құрылған ерікті өрт сөндірушілермен оқу-жаттығу өткізу жоспары басшылыққа алынған осынау дәстүрлі шара өткен бейсенбіде Исатай ауылдық округінде ұйымдастырылды. Дала өрттерін, сондай-ақ мемлекеттік өртке қарсы қызмет бөлімшелері жоқ елді мекендерде өрттерді сөндіру қағидаларына сәйкес өрт сөндіру жасағының дайындығын арттыру мақсат тұтылған шара аталған ауылдық округтің ерікті өрт сөндіру жасағы құрамының қатысуымен өтті. - Оқу-жаттығу барысында жасақ құрамы мен бейімделген топқа қауіпсіздік Ережесі нұсқаулығы өткізіліп, дала өртін сөндіру, алдын алу және жоюда атқаратын іс-шаралар жоспары жасақталды.
Жаттығуға округ аумағында орналасқан мекемелерден меншік түріне қарамастан 2 бірлік су таситын, 1 ваккум, 2 «КамАЗ», 1 жүк, 1 адамдар таситын, 1 жедел жәрдем автокөліктері, 2 бірлік күрегіш тракторы және «Семсер» ЖШС өрт сөндіру автокөлігі жұмылдырылды,-деді бізді шараның жүру барысынан құлағдар қылған аудан әкімі аппаратының мемлекеттік-құқықтық жұмыстар және төтенше жағдайлардың алдын алу бөлімінің басшысы Нұрасбек Бозбалиев. Жаттығу барысында 30 ерікті өрт сөндіру жасақшысы арнайы киімдермен, өртке қарсы құрал-жабдықтармен, байланыс құралдарымен, 1 дабылқаққыш, 4 дүрбімен де қамтылулы. Далалық жайылымында өрт оқиғасы орын алған елді мекеннің карта схемасы да жасақталған жиында шеберлік пен белсенділік көрсеткендер ауылдық округ әкімінің Алғыс хаттарымен марапатталды.
Жоламан ДӘУЛЕТИЯР