Жасанды интеллект (ЖИ) – қазіргі заманның басты технологиялық жетістіктерінің бірі. Сондықтан оның негіздерін мектеп қабырғасынан бастап үйрету – болашақ мамандарды ерте даярлаудың тиімді әрі стратегиялық маңызды жолы. Қазіргі әлемде цифрлық сауаттылық, бағдарламалау, деректермен жұмыс істеу және логикалық ойлау қабілеттері күннен-күнге маңызды бола түсуде. Осы бағыттарды оқушыларға ерте жастан меңгерту – олардың келешекте кез келген салада сұранысқа ие, жан-жақты дамыған, бәсекеге қабілетті маман болуына негіз қалайды.
ЖИ негіздерін оқыту оқушылардың тек техникалық білімін ғана емес, сонымен қатар сыни ойлауын, шығармашылығын және мәселені шешу қабілетін дамытады. Олар заманауи технологияны тұтынушы ретінде ғана емес, оны жасаушы және жетілдіруші ретінде қарастыра бастайды. Бұл әсіресе еліміздің ғылым, білім, өндіріс және экономика салаларын цифрландыруға серпін береді.
Мұндай білімді жүйелі түрде енгізу үшін оқу бағдарламаларын уақытылы әзірлеп, оны мектеп бағдарламасына бейімдеу қажет. Бұл ретте педагог кадрларды даярлау, қажетті оқу құралдарын әзірлеу және оқу процесін практикалық тұрғыдан байыту маңызды рөл атқарады.
Жасанды интеллектті мектептен бастап меңгеру – елдің инновациялық дамуына жасалған инвестиция. Сондықтан бұл бастаманы қолдап, оның тиімді жүзеге асуына барлық деңгейде назар аудару қажет.
Асқар АБУОВ,
Нарын ауылдық округінің әкімі
