Бүгін Исатай ауданына іс-сапармен ҚР Парламенті Мәжілісінің депутаты Серік Ерубаев келді.
Сапар барысында мәжіліс депутаты аудандық ауруханада болып, өткен жылдардағы жаһанды жаулаған індетпен күресте қажырлы еңбегімен көзген түскен бірқатар мейірбикелерге алғысын айтып, «Ақ жол» демократиялық партиясының атынан «Жанқиярлық күресі үшін» төсбелгісін тақты және өзінің алғыс хатымен марапаттады.
Атап айтқанда, аталған төсбелгі аудандық емхананың мейірбикелері Бибігүл Сұлтанова, Алтынай Әбілхайроваға және емхананың кіші қызметкері Клара Хусиноваға тағылса, мәжілісменнің алғыс хаты мейірбикелер Алтынгүл Абуова, Майрагүл Сыехова, Анар Мұхтарова және Айсұлу Апеноваға тапсырылды.
Індетпен күресте өз бастарын қатерге тіккен денсаулық сақшыларын «бүгінгі күннің батырлары» деп айтсақ артық айтқандық болмас. Депутаттың бұл көрсеткен ықыласы мен құрметіне дәрігерлер шынайы алғысын білдірді.
Әділбек СЫРЫМОВ
