Бүгін елімізде атом электр станциясын салу мәселесі бойынша республикалық референдум өтіп жатыр. Тарихи оқиға қазанның бірінші жексенбісінде атап өтілетін Ұстаздар күнімен тұспа-тұс келіп отыр,- деп хабарлайды Атырау облысының Өңірлік коммуникациялар қызметі.
Атырау облысының референдум учаскелерінде дауыс берушілердің арасында білім беру саласына еңбегі сіңген педагогтер мен білім беру ардагерлері де бар. Олардың кәсіби мерекесіне орай дауыс беру учаскелерінде шағын салтанатты іс-шаралар өтеді. Мұғалімдерді мерекесімен құттықтап, оларға көп жылдық еңбегі мен аймақтың дамуына қосқан үлесі үшін Алғыс хат беріледі.
Келешек ұрпаққа сапалы білім беріп, тәрбиелеуге елеулі үлес қосқан ардагер ұстаздарға ерекше көңіл бөлінеді. Олар ел үшін осындай маңызды референдумға қатысудың маңызын айтып, олардың жастар тәрбиешісі ретіндегі дауысы демократиялық процестің маңызды бөлігі екенін атап өтті.
Облыс бойынша 274 референдум учаскесі жұмыс істеуде. Олар таңғы сағат 7:00-ден 20:00 аралығында ашық болады.
