2025 жылдың 24 қарашасында Атырау қаласында Digital AI School оқу орталығының ашылуы өтті. Бұл білім беру алаңында ең сұранысқа ие digital-мамандықтар: SMM, таргеттелген жарнама, контент жасау, AI құралдарымен жұмыс және онлайн-маркетингтің негіздері оқытылады. Мектеп бір жыл ішінде 300-ге дейін маман дайындап, оларға заманауи дағдыларды меңгеруге және қаржылық дербестікке шығуға мүмкіндік береді.
Жобаны digital саласында тоғыз жылдық тәжірибесі бар Виолетта Чуреева құрды. Толыққанды мектеп ашу идеясы бұрыннан болғанымен, оны жүзеге асыру «Жаркыра» әлеуметтік кәсіпкерлікті дамыту бағдарламасының арқасында мүмкін болды. Бағдарламаны «Әлеуметтік бағдарламалар және инновациялар қоры» ҚҚ, ал қаржылық қолдауды «Теңізшевройл» ЖШС көрсетеді.
Бағдарлама финалисті атанған Виолетта 3 700 000 теңге көлемінде пайызсыз қарыз алып, техникалық базаны нығайтуға, оқу материалдарын дайындауға және команданы құруға мүмкіндік алды.
Мектептің құрылу тарихы жай ғана бизнес-жоба емес, негізінде жеке миссия жатыр. Бұл жолда Виолеттаның алты жылдан бері бірге жұмыс істейтін ассистенті — І топтағы мүгедектігі бар (ДЦП) Самалдың рөлі ерекше. Қозғалыс шектеулеріне қарамастан, Самал digital дағдыларды меңгеріп, өз бетінше табыс таба бастады және тіпті жеке пәтер сатып алуға қаржы жинады. Оның тарихы заманауи мамандықтарға қолжетімділік өмірді түбегейлі өзгерте алатынын дәлелдейтін жарқын мысал.
«Digital AI School — адамдардың шынайы өмірлік оқиғаларынан туған жоба. Мен цифрлық мамандықтар адамның еркіндігін, жаңа мүмкіндіктерін және болашаққа деген сенімін арттырады деп сенемін. Мақсатым — бұл мүмкіндіктерді әр адамға қолжетімді ету», — дейді мектептің негізін қалаушы Виолетта Чуреева.
«Жаркыра» бағдарламасына қатысу Виолеттаға маңызды кәсіби тәжірибе де берді: ол Астанада сатылым және сатылымды өсіру бойынша тағылымдамадан өтті. Осы оқу процесінде ол басқару тәсілін қайта қарап, достық стильден жүйелі, мақсат қоя білетін, процестер мен қаржылық модельді нақты бақылайтын жетекшілік форматына көшудің қажет екенін түсінді.
«Тағылымдамалар — бағдарламаның ең құнды элементтерінің бірі. Олар қатысушыларға тек білім беріп қана қоймай, жобаларын жаңа деңгейге көтере алатынына сенімділік сыйлайды», — деп атап өтті «Жаркыра» бағдарламасының жетекшісі Ирина Горбаченко.
Digital AI School заманауи мамандық іздегендерге, жаңа мүмкіндіктерге ұмтылғандарға және қаржылық дербестікке жол салуды мақсат еткендерге арналған өсу алаңына айналуды көздейді.
