С.Өтебаев атындағы Атырау мұнай және газ университетінде жаңа корпоративтік платформаның іске қосылуы жоспарлануда. Соған орай заманауи технологиялар мен жасанды интеллектіге негізделген Shai.pro бағдарламасының ресми таныстырылымы өтті,- деп хабарлайды Өңірлік коммуникациялар қызметі.
Shai.pro – жаңа буынның жасанды интеллект платформасы. Ол компаниялар мен ұйымдарға AI-экожүйе құрып, қайталанатын жұмысты автоматтандыруға, деректердің қауіпсіздігін қамтамасыз етуге және корпоративтік білімді басқаруға мүмкіндік береді. Платформа негізіндегі AI-зертхана үздік тілдік модельдерді бейімдеп, жаңа технологиялар мен ғылыми жаңалықтарды сынақтан өткізіп, бизнеске арналған нақты шешімдер әзірлейді.
- Қазір университетте цифрландыру үдерістері белсенді жүзеге асырылуда. Барлық мамандыққа жасанды интеллект негіздері бойынша пән енгізілді. Сонымен қатар оқытушылар мен студенттеріміз Coursera платформасында, Astana Hub және Huawei оқу алаңдарында жасанды интеллект бағытында біліктіліктерін арттырып, сертификаттарға ие болды,- деді университет проректоры Нұркен Ахметов.
Shai.pro жобасының негізін қалаған командада бүгінде 50-ден астам маман жұмыс істейді. Компанияның құрылғанына 5 жылдан астам уақыт болды. Штаб-пәтерлері Ұлыбританияда, АҚШ-та және Сингапурда орналасқан. Қазақстанда жоба екі жылдан бері табысты жұмыс істеп келеді.
