Ауыл- қазақтың нағыз күретамыры болып табылады. Ұлттық құндылықтың ошағы да осы ауылдан бастау алады. Соңғы кездері ауылдық жерлер әлеуетін арттыруға баса назар аударылып келеді.
Президент ауыл-аймақты кешенді түрде өркендету аса маңызды екенін айтқан еді. Шалғай ауылдарды қалай сақтап қаламыз? Деградациялық жағдайда тұрған ауылдардағы халық санын қалай көбейтуге болады? Ауылдық жерлерді дамытуға бағытталған бағдарламалар қаншалықты нәтиже беріп жатыр? Ауыл мен қаланың өркениетін, инфрақұрылымын қалай теңестіруге болады? Көптен бері ауылға қатысты сауалдар аса маңызды бола бастады. Үкімет ауылдық аймақтарды дамытудың 2023-2027 жылдарға арналған тұжырымдамасын бекіткенін білеміз. Тұжырымдама ауылдық аумақтардың географиялық ерекшеліктері мен бәсекелестік артықшылықтарын ескеріп, олардың әлеуметтік –экономикалық әлеуетін арттыруға бағытталған тұжырымдама аясында ауыл тұрғындарының табысы мен тұрмыс сапасын арттыру бойынша түрлі шаралар қарастырған. Басты назар «Ауыл-ел бесігі» жобасы арқылы даму әлеуеті жоғары 3,5 мың ауыл-елді мекенді кешенді жаңғырту деп танылды. Бұл дегенің ауылдардың 90 пайызға жуығы. Елді мекендерде адамдардың жұмыс істеуі мен тұруы үшін қолайлы жағдай жасау есебінен экономикалық өсудің жаңа нүктелеріне айналуы тиіс. Басты мақсат-әлеуметтік, инженерлік инфрақұрылымды дамыту арқылы қолайлы ортасын қалыптастыру деп танылды. Бұл жаңа мектептер мен медициналық нысандар салу, таза ауыз сумен, электрмен жабдықтау, кең жолақты интернет, спутниктік байланысқа қолжетімділікті қамтамасыз ету, ауылішілік жолдар сапасын арттыру, мәдениет үйлері, мұражайлар, кітапханалар, спорт ғимараттарын салу, халыққа қызмет көрсету орталықтарын ашу. Ауылдағы тұрғын үй құрылысын жандандыру үшін инженерлік коммуникацияларды жаңа жер учаскелерін жеткізу жұмыстары жалғасады.
Ауыл тұрғындарының табысын арттыру үшін агроөнеркәсіптік өндірісті жандандыру, кәсіпкерлікті, ауыл шаруашылық кооперациясын дамыту жолымен шешу де бар. Осылайша шағын шаруашылықтарды біріктіру, ауыл шаруашылық кооперативтерін ұйымдастыру фермерлерге тұқым, тыңайтқыш, жем, агротехникалық, ветеринариялық қызметтер шығындарын қысқартуға, жер учаскелерін, ауыл шаруашылық техникасын, ирригациялық және дренаждық жүйелерді бірлесіп пайдалану есебінен өндірілген өнім көлемін арттыруға, сондай-ақ өндірілген тауарларды делдалдарсыз тұрақты өткізуге мүмкіндік береді.
Жалпы мұндай тәсіл бизнес ортаны дамытуға, ауылда нарықтық, көліктік, логистикалық инфрақұрылымды қалыптастыруға ықпал етеді. Сонымен қатар қызмет бағыттарын кеңейту есебінен жаңа жұмыс орындары пайда болады. Осылайша ауылдан жас кадрлар кетуі азаяды. Бүгінгідей қоғамның рухани жаңғыру кезеңінде ауыл жаңа келбетке, ал оның рухани өмірі уақыт шындығы мен талаптарына сай келетін жаңа мазмұнға ие болуы тиіс. Ауылды дамытуды мемлекеттің басым бағыты ретінде қарап, мемлекетті дамыту үшін ауылды одан әрі көркейтіп, гүлдендіру қажет деп ойлаймын.
С.Оразғалиев, зейнеткер
