«Бақытты отбасы – бақытты ел»: Атырауда тұрмыстық зорлық-зомбылыққа қарсы күрес шаралары қарқынды жүргізілуде

Мемлекет басшысының арнайы тапсырмасына сәйкес, елімізде отбасылық-тұрмыстық зорлық-зомбылықтың алдын алу және оған қарсы күрес – мемлекеттік саясаттың маңызды басымдықтарының біріне айналды. Бұл мәселе тек құқықтық салада ғана емес, бүкіл қоғамның белсенді қатысуын қажет ететін өзекті әлеуметтік түйткіл болып отыр.

27 тамыздан бастап 10 қыркүйекке дейін елімізде «Бақытты отбасы – бақытты ел» атты кең ауқымды акция өткізілуде. Акцияның басты мақсаты – отбасындағы зорлық-зомбылықтың алдын алу, әйелдер мен балалардың қауіпсіздігін қамтамасыз ету, қоғамда зорлық-зомбылыққа мүлдем төзбеушілік көзқарасын қалыптастыру және үнсіз қалмауға үндеу.
Атырау облысында да іс-шара бойынша жүйелі шаралар қолға алынған. Қалалар мен аудандарда дөңгелек үстелдер, тренингтер, құқықтық кеңес беру алаңдары ұйымдастырылып, салааралық өзара іс-қимыл күшейтілуде. Мәселен, «Алмагүл» мөлтек ауданындағы «Отбасын қолдау орталығында» өткен дөңгелек үстелде психологтар, заңгерлер мен әлеуметтік қызметкерлер зорлық-зомбылықтың алдын алу, зардап шеккен жандарға көмек көрсету жолдарын түсіндірді.
2024 жылы ҚР ӘҚБтК-нің 73-1 бабы, яғни денсаулыққа қасақана жеңіл зиян келтіру және 73-2 бабы, яғни отбасы-тұрмыстық қатынастар аясындағы құқыққа қарсы әрекеттерге бірқатар маңызды өзгерістер енгізілді. Енді жәбірленуші арыз жазбаса да, полиция құқық бұзушыға қатысты әкімшілік іс қозғай алады. Сонымен қатар, ҚР Қылмыстық кодексіне 108-1-бап, 109-1-баптары қосылып, құқық бұзған жағдайда қылмыстық жауапкершілік көзделген. Бұл өзгерістер құқық қорғау органдарының әрекет ету аясын кеңейтіп, жәбірленушілерге қорған болуға мүмкіндік беріп отыр.
2025 жылдың басынан ҚР ӘҚБтК-нің 73-бабы бойынша 3232 әкімшілік құқық бұзушылық тіркелді. Отбасындағы агрессорларға 2746 қорғау нұсқамасы шығарылып, 700 тұлғаға ерекше талаптар белгіленді. Полиция жолдамасымен 5 әйел мен 11 бала тұрмыстық зорлық-зомбылық құрбандарына арналған дағдарыс орталығына орналастырылды. Бұдан бөлек, «Тұрмыс», «Құқықтық тәртіп», «Учаске», «Қауіпсіз қала» секілді жедел-профилактикалық іс-шаралар жүзеге асырылып, құқықтық мәдениетті арттыру бағытында ауқымды түсіндіру жұмыстары жүргізілді.  «Шанырақ-2008», «Құқық», «Жарқын жанұя», «Ана үйі» қоғамдық бірлестіктері мен Атырау облысы ПД қызметкерлері бірлесе отырып, халықпен үгіт-насихат жұмыстарын белсенді жүргізіп келеді. Агрессорлармен профилактикалық 

әңгімелер өткізіліп, отбасылық құндылықтарды сақтау мәселесі кеңінен көтерілуде. 
Кез келген адам отбасындағы зорлық-зомбылық туралы полицияның 102 арнасына және 111 – балалар мен отбасын қолдау ұлттық сенім телефонына, 150 – тұрмыстық зорлық-зомбылық құрбандарына арналған ұлттық сенім телефонына хабарласа алады. Бұл желілер арқылы дағдарыс орталықтарының мекенжайларын және психологиялық көмек алуға болады.
 «Бақытты отбасы – бақытты ел» акциясы – зорлық-зомбылыққа қарсы тұруға бағытталған бірлескен күш-жігердің айқын көрінісі. Бұл бағыттағы жұмыстар алдағы уақытта да жалғасын тауып, зорлық-зомбылыққа жол жоқ деген қағиданы қоғам санасына сіңіру үшін жүйелі іс-шаралар жүзеге асырылмақ.

ФОТОГАЛЕРЕЯ

БІРІҢҒАЙ МЕМЛЕКЕТТІК БАЙЛАНЫС

AQPARATPRINT