Қазақстанның картасына назар аударсақ, елімізде 188 аудан бар. Оның 65-і шекаралық аймаққа жатады. Сол 65 ауданда 1 млн 700 мың адам тұрады. Демек, шекара маңында халқымздың 8,5 пайызы өмір сүреді екен.
Бүгінде еліміздің босағасы бекіп, шекарасы шегенделген, ешкіммен территориялық дауымыз жоқ. Дегенмен шекаралық аудандардың мәселесі назардан тыс қалдыратын тақырып емес. Өткен жылы Мемлекет басшысы Қ.Тоқаев өткен жылы «Бізде 65 шекаралық аудан бар. Өкінішке қарай, олардың көпшілігінің әлеуметтік-экономикалық жағдайы төмен деңгейде. Бұл аудандардың стратегиялық маңыздылығын ескере отырып, менің тапсырмам бойынша әзірленіп жатқан ауылдық аумақтарды дамыту тұжырымдамасы шеңберінде шекара маңындағы аумақтарды дамыту жөніндегі нақты шараларды әзірлеу қажет. Басты мақсат – халықтың кетуін азайту, адамдардың өмір сүруіне қолайлы жағдай жасау, шекара маңындағы аудандардың экономикалық дамуына жаңа серпін беру» деген болатын.
Ал, кешелері өткен төртінші ұлттық құрылтайда Президент Шығыс Қазақстан мен Абай облыстарында бірнеше аудан қалпына келтірілгенін мәлімдеді. Осыған сай бұл елді мекендерге дербестік беріліп, өз тізгінін өз қолдарына ұстатуға мүмкіндік алды. Жаңадан құрылған аудандарда тіршілік жанданып, инфрақұрылым жақсарды. Енді сол маңның тұрғындары бұрынғыша жылы орындарын суытып, үдере көшпейтін болды. Қайта ата-баба қонысына қайта оралу үдерісі байқалды. Бұл шекара маңын жалаңаштамай, қызу қайнаған тірлік, берекелі бірлік барын айғақтайды. Өткен жылдары Семей өңірінде болғанымда адамдардың қоңырқай күйін көріп, көңілім қоңылтақсып қалған болатын. Ондағы ағайындардың жағдайлары бүгінде жақсы екенін естігенде көңіл бірленді. Лайым еліміз көркейе түссін!
Әуез Ізжанов,
білім қызметкерлері аудандық комитетінің төрағасы
