Қ.Тоқаев зейнетақы жүйесінің тиімділігін арттыруға үлкен мән беру қажеттігін баса айтты.
НҰР-СҰЛТАН, 2 қыркүйек – Sputnik. Мемлекет басшысы Қасым-Жомарт Тоқаев азаматтарға зейнетақы жинағын пайдалануға рұқсат беру мәселесін пысықтауды үкіметке тапсырды, - деп хабарлайды Sputnik Қазақстан тілшісі.
"Үкімет пен ұлттық банк біраз шаруа атқарып, зейнетақы жүйесінің тиімділігін арттыруы қажет. Бүгінде жұмыс істеп жүрген адам зейнетақы жинақтарын пайдалана алмайды. Оны тек зейнетке шыққан кезде ғана алуға рұқсат бар. Бірақ ол ақшаның зейнетке дейін пайдаланамын дейтін адамды да түсінуге болады.
Сондықтан үкіметке жылдың соңына дейін жұмыс істейтін адамдардың зейнетақы жинақтарын мақсатты пайдалану жағын пысықтауды тапсырамын" деді Тоқаев алғашқы жолдауды жариялау кезінде.
Мемлекет басшысының сөзіне қарағанда, зейнетақы жинақтарын баспана сатып алуға немесе білімге жұмсауға болады.
Айта кетейік, Президент Қасым-Жомарт Тоқаев парламенттің екі палатасының бірлескен отырысында алғашқы Қазақстан халқына жолдауын жариялап жатыр.
