Облыстық білім беру басқармасының жылдық жоспарына сәйкес қаңтар-ақпан айларында мектеп және колледж оқушылары арасында IX қысқы спартакиада өткен болатын.
Қысқы спорт ойындарының 5 түрінен өткен бұл дүбірлі додаға ауданымыздың командасы қатынасып, тұңғыш рет командалық 2-орынға ие болды. Атап айтар болсақ, хоккейден өткен сайыста Новобогат, Ғ.Мәсәлімов атындағы орта мектептердің оқушылары қатынасып, 3 орынға ие болды (жаттықтырушылары Б.Қарабалина, А.Құрманғалиев). Шаңғы жарысы, биотлон, президенттік көпсайыстан Ғ.Мәсәлімов атындағы орта мектептің оқушылары Саят Сабитов пен Нұрбек Айбатыров 3 орындарға ие болды (жаттықтырушысы А.Құрманғалиев). Ал, футзалдан өткен жарыста белсенділік танытқан «Барыс» балалар-жасөспірімдер денешынықтыру даярлық клубының ұлдар командасы 3, қыздар командасы 1-орындарды жеңіп алып, 27 ақпанда Щучинск қаласында өтетін республикалық спартакиадаға жолдама алды (жаттықтырушылары Ө.Шайхиев, А.Бисенбаев).
Осындай нәтиже көрсетіп, жалпы командалық есепте Атырау қаласынан кейінгі екінші орынды еншілеп қайттық. 3-орын Индер ауданының командасына бұйырды.
Ұстаздар мен жаттықтырушылардың еңбегін ескере отырып, алдағы уақытта да оқушыларымыз биік белестерден көріне береді деген сенімдеміз.
Мырзахмет ҒҰБАШЕВ,
аудандық білім бөлімінің әдіскері.