Жақында Ақтау қаласында джиу-джитсудан (Файтинг-систем, Не-ваза-систем) 2004-2006 жылы туылған жасөспірім ұлдар мен қыздар арасында Қазақстан Республикасының чемпионаты өтті.
Бұл біріншілікке еліміздің түкпір-түкпірінен 300-ге жуық спортшы жиылып, бақ сынады. Оның ішінде Атырау облысы құрама командасы сапында өнер көрсететін Исатай балалар-жасөспірімдер спорт мектебінің шәкірттері де күш сынасып, жүлделі орындарға ие болып қайтты. Атап айтсақ, Н.Абдеш баптайтын Шұғыпан Айару (неваза, файтинг) үшінші орынға ие болса, А.Оралбековтің шәкірті Гүлжанат Болатова файтингтен 1-ші, невазадан 2-ші орындарды қанжығаға байлап, абыройымызды асырып қайтты. Осылайша Гүлжанат осы жылдың қыркүйек айында Греция мемлекетінде өтетін әлем біріншілігіне жолдама алды. Жас палуанымызға алда да үлкен жетістіктер тілейміз.
Серікбол Панабердиев