Қырғызстан елінде өткен байрақты бәсекеде алтын еншілеп қайтқан Исатай ауылының тумасы, «Барыс» спорт клубының шәкірті Дидархан Ғайнеденді жерлестері сән-салтанатымен күтіп алды.
Жаһандық жарыста жасындай жарқылдаған палуанның жеңісіне ортақтасқан ауылдастары шырайлы жүздесуде спортшыға ізгі тілектерін жолдап, оның алдағы бәсекелерде де ел намысын абыроймен қорғай беретіндігіне сенімдерін білдірді. Сондай-ақ сөз кезегін тізгіндеген ауыл әкімі Аслан Ғұбаш осындай жетістіктер өсіп келе жатқан барша жастарға үлгі екендігін тілге тиек етіп, жеңіске жету жолында шын талантты тани біліп, жасынан шыңға жетелеген бапкері Тұрар Ризуановқа сіңірген еңбегі үшін барша ауылдастары атынан ризашылығын жеткізді.
Өз кезегінде Дидархан өзіне сенім артып, қолдау танытқан барша ауылдастарына перзенттік алғысын жаудырып, алдағы уақытта да бапкердің нұсқаулығымен тәжірибесін арттырып, бұдан да ірі бәсекелерде тұғырдың биік сатысынан көріну жолында барын салатындығына уәде етті.
Айта кетейік, маусым айының соңғы күндері Қырғызстан елінде спорттың барлық түрінен «PEARL OF KYRGYSTAN» VI Халықаралық фестивалі өтіп, дүбірлі додада Дидархан самбо күресінен 46 келі салмақ дәрежесінде ел намысын қорғады. Нәтижесінде, жерлесіміз өз тобында өткізген 4 кездесудің барлығын сәтті аяқтап, жеңістің тұғырына көтерілген болатын.
Әділбек СЫРЫМОВ