Жанбай ауылдық округі әкімшілігінің ұйымдастыруымен қазан айының 9-10 күндері көше-көшеге бөлінген ауыл жастары арасында футболдан турнир өтті.

Ел Тәуелсіздігінің 30 жылдығына орай ұйымдастырылған турнирге «Байтөбе», «Себектоп», «Водокачка», «Телевышка» және «Шанхай» атты көше атауларымен аталған 5 команда қатысты. Екі күнге созылған турнирдің жеңімпаздарын ауыл әкімі Дидар Есмұханов марапаттады.

Турнир нәтижесі бойынша «Үздік шабуылшы» аталымын Жандарбек Қалисов алса, «Үздік қақпашы» аталымына Ербол Салық, «Үздік қорғаушы» аталымына Досжан Тәжібай лайық деп танылды. Командалық есепте І орынды «Шанхай» көшесінің жастары, ІІ орынды «Шекарашылар», ІІІ орынды «Телевышка» көшесінің жастары иеленді. Жеңімпаз командаларға ұйымдастырушылар тарапынан арнайы алғыс хаттар табысталды. Сондай-ақ ауыл тұрғындары Аман Ибатов және Ерден Қапаровтар да ауыл спортының дамуына қосқан үлестері үшін ауыл әкімінің қолынан алғыс хатпен марапатталды.

- Іс-шараны өткізудің негізгі мақсаты – тәуелсіздігімізді мадақтау. Мүмкіндігіміз келгенше өзіміздің спортқа деген  оң көзқарасымызды жастарға көрсету керекпіз. Салауатты өмір салтын барынша насихаттау қажет, - дейді ауыл әкімі Д.Есмұханов.

Әділбек СЫРЫМОВ